Das isch d Idee, das isch de glatti Hammer:
Mir leged eifach ali Strasse tüüf!
Jetz isch es z Winti uus mit Lärm und Ggjammer
Und d Garteschtadt isch freï vom Uuspuff-Mief.
Vo Turbetal uf Züri und Schaffhuuse
Gahts nüme z mittst dur eusi Wohnquartiër
Au a de Tösstalschtrass chasch wieder pfuuse
D Lüüt fühled sich uf Wulche sibe schiër.
De Plan wos bruucht zum Wüsse wos mues dure
Machts Bou-Mobilitätsdepartemänt
Dè Huufe Bläch muës unedure pfure
Und Bus- und Veloschtadt häts Regimänt
Di blaue Kantonal-Hauptschtrass-Wägwiiser
Sind i de Schtadt zum Glück jetz au verbii.
Sie schtammed ‒ s Bildarchiv weiss es präziser ‒
No us de Ziit vo de Kavallerie.
Au d Autofan und and’ri Lüüt vo vorig
Vergässed ihres Gschtürm und ihren Mais
Um e banali Heiligberg-Durborig:
Si chömed änem Rossberg uf d A eis.
Und Tämpo 30 muës d SVP nümm biisse,
Im Tunnel gilt ja füfzg oder no meh
D Dosiërig Seemerbuck chasch wieder schliisse
Und d Bushaltschtell Waldegg tuët nüme weh.
Für d Velo bruuchts ab jetz kä neui Route
Di alte Schtrasse sind defür jetz guët,
Fasch überall chönd d Chind ungfȫhrli tschuute
Und d Muëter sitzt jetz nüme so uf Gluët.
S isch wieder friedlich wi i alte Ziite
Kei Abgas und kei Gift für Schtruuch und Baum
Jetz ghör i aber grad de Wecker lüüte
O jammerschaad, s isch ales nur en Traum.
