Wiisheite vom Schtammtisch
Xavi:
Viër Wuche vor em Abschtimmigs-Sunntig zu de AHV-Iniziative ghört und list me nüüt me anders. Vor luuter Argumänt defüür und degäge wird s eim ganz Schturm im Chopf. Luuter so Begriff wië „Giesskanne“ und „Chrüüzfahrt-Früehräntner“.
Mugi:
Ich wirde i föif Jahr pangsioniërt. Wänn s dänn amigs e AHV-Grati git, dänn nimm ich si mit Handkuss au us de Schprützchane. Schliëssli han i lang ganz aaschtändig Biiträg zahlt.
Xavi:
Jää, bisch da so sicher? Es git da ja no e zweiti Iniziative für e Ufesetzig vo de Altersgränze. Uf eimal muësch dänn no länger warte. Ich weiss ömel bi beidne Vorlage nonig, win i sell schtimme.
Harri:
Für miich isch s eigetli ziemli klar. Ich ha glaub bi Volksiniziative im Bund no nië ja gschtimmt. Es sind ja Verfassigsiniziative. Da isch mer d Gfahr vil z gross, dass es en ungghörige Flick i de Bundesverfassig git.
Xavi:
Meinsch esoo, wi bim Minarett-Verbot?
Harri:
Ja genau! Doo isch es esoo passiërt. Jedi Schplitterparteï meint efäng, sie mües e Iniziative schtarte. Nur zum sich profiliëre mit öppis möglichscht Populistischem. Offebar isch es hützutags vil z eifach, dië nötige Underschrifde zämezbringe.
Mugi:
Aber me weiss doch, dass es bi de AHV Handligsbedarf git. Da muës doch öppis passiëre. Und drum häm mer doch eusi diräkti Demokratie.
Harri:
Für das häm mer aber doch de Bundesrat und s Parlamänt. Dië häm mer doch für das gwählt und dië händ ja für Ändi 2026 umfassendi Vorschläg aagkündt für alles, wo d Altersvorsorg betrifft. Das sind dänn kä Schnällschüss und chömed als uusggriifti Lösige vor s Volch.
Xavi:
Ja, schtimmt. und wänn s nu Gsetzesänderige wèèred, dänn häm mer ja no s Referändum.
Harri:
Ebe das mein i und säge drum zweimal Nei.
Röösli, no dreï Schtange!
