Wiisheite vom Schtammtisch
Xavi:
S tunkt mi, uf de Tösstalschtrass dur Seeë duur heïg s vo Tag zu Tag meh Verchehr. Zwüsched de Liëchtsignal Hinderdorf und Schuëlhuus hät s efäng i beidne Richtige zwenig Platz für di uufgschtaute Kolone.
Mugi:
Eigetli isch s es Wunder, dass s nid meh Unfäll git. D Velo vo obenabe händ bis zum Coiffeur Herde en Veloschtreife und vor em Rotliëcht en Warteruum. Sie schtarted bi Grüen mit e chli Vorschprung, aber di pressante Auto wetted s dänn z mittst uf de Chrüüzig überhole. Und jetzt ‒ o Schreck ‒ isch plötzli z wenig Platz. Ab Höchi Schuëlhuus hät s kän Veloschtreife meh, defür vo de Gägesiite her zwoo Schpure; halt ebe eini für dië, wo deet warted zum linggs i d Kanzleïschtrass Abbüge. Zum Biischpiel de 2er-Bus. Händ er dië heisse Situatione au scho gseh? Miir wird amig Angscht und Bang.
Harri:
Als Velofahrer sötsch da zur Sicherheit am beschte z mittst uf de Schtrass fahre, bis es dänn wiiter une wieder en Schtreife hät. Aber wer dänkt scho a dië Gfahr vo hine?
Xavi:
Es hät emal eine gsäit, dië vile neue Bewohner im Sännhof und z Kollbrunn göchid dänn ali uf de Zug. Hihii, ‒ wi wänn dië Lüüt nur i d Schtadt ië wettid. Aber au uf Züri, Schaffhuuse und i d Oschtschwiiz muësch ebe dank de wiitsichtige Planig daa dure und via Winti-Zäntrums-Ypsilon uf d Autobahn.
Mugi:
Da chunnt mer grad es supers Müschterli in Sinn. Han i doch da i de SRF-News vo aafangs Auguscht ggläse, z Betlis am Walesee i de Gmeind Amde liidi me under em Tourischteverchehr. Ales seïg mit Auto verschtopft, d Parkplätz scho am Morge überfüllt und uf em schmale Zuëfahrts-Schtrȫȫssli alls blockiërt wäg de Wildparkiërer. Di rund 40 Bewohner und d Behörde wüssid sich nüme z hälfe.
Harri:
Jä aber und dänn de ÖV? Das wär doch grad für es Gebiët äne am See di bescht Lösig. Luëg da han i de SBB-Fahrplan uf em Handy. Chasch Winterthur – Betlis iigèè und gsehsch au no grad de komfortabli Aaschluss für s Poschti und s Schiff.
Mugi:
Das isch ebe de Witz! D SBB-Billet und -Abo und au EasyRide oder Fairtiq gälted zwar uf de meischte Liniëschiff, aber nid bi de Schiffsbetrieb Walensee AG. „Äätsch, hier bin ich nicht auch ein Schiff!“ müest z Ziëgelbrugg a de Loki und am Poschtauto für uf Weese aagschribe sii.
So muës me s halt mache, wäm me es Verchehrs-Puff wott.
Harri:
Röösli, no dreï Schtange!
