Für d Schuëlchind, doozmal i de Viërzgerjahr
Sind d Turnschuëh gsii us Sägeltuëch und blau
Am Schpitz en schwarze Gumischutz sogar
Und d Sole gääl-orange us Gumi au.
Mir hättid d Tuschi gern de ganz Tag träit
Doch nei, das gebi schlächti Ggrǖch ud Gschtank
Ad Füess, da bruuchi s Läder, hät me gsäit
Das Sägeltuëch chömm mit em Schweiss nöd z Rank.
Und hüt häsch nur no Turnschuëh vor em Gsicht
Nöd nu zu Jeans, nei au zur feine Kluft
Si heissed Sneakers und sind fasch scho Pflicht
Am beschte wiiss und tüüre Margge-Duft.
Und wänn s us Läder sind, so isch – herrjeh
Doch mindischtens no d Gumisole wiiss
Am Teil, wo z ersch in Dräck chunnt, sell me gseh
S isch nöd per Zuëfall dräckig, nei – mit Fliiss.
Mir chunt e Prachtsidee i dene Täg
Ich schaff de Turnschuëh-Mode frische Schnuuf
Und bring als supergeile neue Gäg
Di alte Schüelertuschi wieder uuf.
