Jede thront i sinere Chischte
Stolz uf Blääch und Chrom und Lagg
Forsch voraa uf allne Pischte
Fräch hät rächt, nur nöd de Gagg
Leider hät s so vill Schiggane
Wo n eim vor de Freïheit schtönd
Schliicher, Rotliëcht, Isebahne
Wo massiv uf d Nerve gönd
Andri sötted chli schtudiëre
S hät z vill Tuble uf de Gass
Alli sind mit allne Viëre
Schpielverderber a miim Schpass
Hät s am Chreisel zwoo Kolone
Git me Gas und schlüsst schön aa
Susch meint plötzli no e son e
Pumpi, wellsch en ine laa
Wett en Schtadtbus sit Minute
Use vo de Siiteschtrass
Söll er mir i d Chappe tute
Jetz chunnt zersch de Maa vom Gas
Überhaupt sind ÖV-Chunde
S Letscht, was mir je abe miëg
Wer mich schtört uf mine Runde
Dem erchlèèr ich glatt de Chriëg
Wiisse Balke vor em Rotliëcht?
Halte wäg em Querverchehr?
Weisch im Fall, was de Chaot miëcht?
D Lücke schlüüsse schnäll, uf Ehr
Jaa nöd zuelaa, das no eine
Schnäll vor d Schnöre inetruckt
Vorne fühlt sich eusereine
Besser als nach hine ggruckt
Wänn d hingäge mal wetsch halte
Zum de Schatz Uusschtiige Laa
Muesch nur dini Nerve bhalte
S sölled luege hinedraa
Hät s kä Platz zum Überhole
Müends halt e chli warte jetz
Söll s miraa de Tüüfel hole
Iich han miini eigne Gsetz
Iich chann fahre wië kän Zweite
Gönd ewägg, jetz chunnt de King
Rücksicht wär e grossi Pleite
Isch nur für Aafängerling
Mues mich schliessli konzentriëre
Frèèse, das isch mi Potänz
Ha kä Ziit zum vill Schtudiëre
Aaschtand isch für Gritibänz
Nur wänn, was ich sälte pfläge,
S Bläch nöd isch, wo rundum schützt
Ohni Auto mich bewege
Und käs Gaspedal mer nützt
Säged Fründ und au Bekannti
Alli wo d halt e so kännsch
Lueg, dèè netti und galanti
Ganz en schtinknormale Mänsch
