Jamben, für einmal fünf-hebig: abaab, cdccd usw.

Mir sind erfolgriich und mir sind mobil
Sind immer gschprängt und händ für nüüt de Ziit
Mir meined, euses gschäftig Tue heïg Schtil
Und säged gar, de Wäg seïg euses Ziel
Und d Reis mües wiit gah; eifach möglichscht wiit

Und s langet nöd, mir wänd s dänn au no gschwind
Chuum rächt am Aafang, wünsched mir scho s Änd
Und wä m mer in Rekordziit aachoo sind
So merked mer, das mir samt Hund und Chind
Ja gar nöd wüssed, was mir da jetz wänd

Wië wär s, sich hüt emal chli ernschthaft z bsine
Was eim cha so in Schtress und Unrueh triibe
Dië bangi Angscht, so komisch i n eim ine
Me laufi punkto Schtatus näb de Schine
Und chön nöd gäg de Nachber Pluspünkt schriibe

Wänn d Jagd nöd wär nach dem, wo jede glaubt
Es seïgi s Glück, won er für sich mües fange
Und wänn de Niid nöd wär und überhaupt
Kä Prestige-Dänke won eim d Nachtrueh raubt
Wür d Ziit zum s Glück Erläbe vorig lange