Die Fragen stellte F.R. Ugly
Herzlich willkome, Herr Hans, im Schtudio. Es hät eus wichtig gschune, Sie zu dere Kampfflugzüg-Beschaffig mit de F35 z befrȫȫge. Nachdem dië bschlossene sächs Milliarde nöd für 35 Flüger langed, söled jetz ja no di nötige Hangar-Boute s Budget massiv schpränge.
Danke miinersiits für d Iiladig. Herr Frȫȫgli.,
Ich cha miini Meinig aber halt nöd uf d Flüger beschränke. Für miich isch es e Frag vo de veränderete Situation uf de Wält und de nötige Konsequänze für eusi Ussepolitik und d Armee ganz allgemein.
Das tönt interessant und mir sind gschpannt, was Si daademit wänd säge.
Di bürgerlich Haltig, wo bi eus zu dene Frage ja massgebend isch, hät sich ebe bbildet nach de Helvetik und de beide Wältchriëg. Europa isch no hüt – trotz EU – militärisch en Kontinänt vo luuter einzelne Nationalschtaate mit eigener Armee. Wänn s aber e Bedrohig git, so chunnt dië nüme vo de Nachbere, wi no 1939, sondern vo de Wältmächt China, Russland und USA, wo offebar druff und draa sind, d Wält wele mit Gwalt under sich uufzteile. Gäge dië Grosse nützed dië individuelle Heer nüüt. Sogar d Funktion vo de NATO isch hüt ja bekanntlich in Frag gschtellt.
Guët, aber für all Fäll, muës me sich doch vorbereite, zum sich nötigefalls au no chöne für sich sälber wehre, wämm mer gwartet händ bis d Russe-Panzer am Rhii sind?
Luëged Si, wänn mich son en grosse, schtarche Fätze am Chrage packt und mis Portmenee verlangt, söll ich mich dänn wehre und em zersch emal eini schmiëre? Wänn em dänn dezuë ane no d Nase weh tuët, dänn verlüür ich nöd nume s Gält, aber au no miini körperlich Unversehrtheit. Wäm me sich wehrt, macht son en Gägner eifach ales kaputt, Mänsche und Infraschtruktur. Er wott eifach s Portmenee, reschpäktive s Territorium. Das vo de Abschreckig, wil eine en z gosse Priis müest zahle, chönnd Si hützutags vergässe. Em Putin isch es gliich, wivil jungi Sibiriër i de Ukraine schterbed und was alls kaputt gaht.
Ihri Meinig überrascht mi jetz aber. Dänn sind Si also en waschächte Pazifischt; oder isch es öppe religiös bedingt im Sinn vo de Bergpredigt?
Nei, beides nööd. Au iich wett mi wehre, aber mit taugliche Mittel. Gäge en Mächtige bruuchts ein ebeso Gosse Schtarche – en Europa-Amee vom ene grosse Heer us de Nationalstaate, mit abgschtimmte Mittel und eme Einheits-Kommando. Aber mit Waffe und Flüger us Europa, wo nöd scho mit beiiflussbarer Elektronik vo anderne Grossmächt chönd gschtüüret werde. Dezuë bruuched d Länder dänn sälber nu no eigni Bode-Luft-Abwehr gäge Rageete und Drohne und ganz wichtig: Kataschtrophehilf mit schwere Maschine, Schutzrüüm und e guëti Notschtrom-Versorgig.
Ahaa, jetz verschtahn i, was Si meined, und das git eim z dänke. Beschde Dank!
