Die Fragen stellte F.R. Ugly
Danke, Herr Hans, dass mer Sie wieder emal nach Ihrer so uufschlussriiche Meinig zun ere politisch aktuele und brisante Aagglägeheit dörfed konsultiëre.
Nur zuë, Herr Frȫȫgli, ich bi wi immer gern bereit, miini Überlegige wiiterzgèh.
Nachdem s Volch ersch vor wenige Jahr mit de Energieschtragegie 2050 de Neubou vo Atomchraftwerch verbote hät, wett jetz de Bundesrat das Verbot mit ere Gsetzesänderig wieder kippe. Was säged Sie da dezuë?
Ja, da schtöm mer sicher vor ere schwierige Entscheidig. Ich bin doozmal au klar für das Verbot gsii. Underdesse isch aber au bi miir wieder e gwüssi Angscht vor ere mögliche Schtromknappheit uufchoo.
Ebe wäge dem lanciëred ja bürgerlichi Chreis sogar e Initiative, zum das Verbot wieder
uufhebe.
Ich findes immerhin guët, dass de Bundesrat da nöd eifach schtillschwiegend zuëwartet und mit siim planete indiräkte Gägevorschlag öppis gäge s zuëgschlagne Tǖrli undernimmt.
Em Volch siini Angscht vor ere mögliche Kataschtrophe und vor allem vor de radioaktive Abfäll isch aber de Grund gsii für de doozmalig Abschtimmigsentscheid.
Das schtimmt; genau wi bi miir au. Aber s Verbot isch wäge dem ebe gäge di verschidene Unsicherheite ggrichdet gsii. Wäm me dië Beschtimig esoo relativiërt, dass me schpȫȫter mit neue Technologieë doch no chönnt profitiëre von ere suubere Schtromprodukzion, so wǖǖr me sich dië Chance nöd vergèh.
Was miich am Ganze no e chli schtört: Werum cha me nöd eifach i föif Jahr über d Uufhebig vom Verbot abschtimme, wänn d Forschig und di technisch Entwicklig e so wiit isch?
Herr Hans, beschde Dank, da hät sich das Gschprȫȫch mit Ihne wieder emal gglohnt.