Die Fragen stellte F.R. Ugly
Herr Hans, isch d Fifa-Fuëssballwält nach dene Presidäntewahle wieder in Oornig?
Sie säged s richtig, Herr Frȫȫgli. D Fifa-Fuëssballwält. Dië funktioniert esoo, wi si immer funktioniert hät. Ohni dè maffiösi Touch gaht s gar nöd. Wië überall, wo s um vil Gäld gaht.
Was wänd Sie da demit säge, a was dänked Sie?
Zum Biischpiel a eusi zwoo Parlamänts-Chammere z Bèèrn. Zweihundertsächseviërzg Lüüt wo emene Parteïbuëch verpflichtet sind und unschiniërt Interässe vo ihrne Schponsore verträtted. Debii sötted s aber gliichziitig eigentlich das mache, wo ihri Wähler von ene erwarted. Vo dene sind s ja als Volksverträter beuufträit und vo dene wetted s au wieder ggwählt werde.
Immerhin händ s ja dänn also d Wähler bi de nôôchschte Wahle i de Hand!?
Das isch ebe s Perfiidi a dere Ggschicht. Öb „König Sepp“ oder Nazional- und Schtänderaat. De Schpagaat beherrsched dië mittlerwiile e soo guët, das s Fuëssballer- und s Wählerpublikum meined, es ggschèèchi ales zu ihrem Wohl. Si chlatsched Bravo zun ere WM im Emirat Qatar und lönd s sich gfalle, dass s zu de Abzockerfrag nur töörfed am Schtammtisch e chli polemisiëre. Si merked nöd, dass da „Diener zweier Herren“ am Werch sind.
Das wär ja schiiheilig und s Volk für dumm verchauft. Wië chönnt me dänn so Politiker Ihrer Meinig nah abschtraafe?
Zum Biischpiel bi de Nazionalratswahle de neue Mitti-Parteie d Schtimm gèè. Oder kä vorddruckti Parteïliischte bruuche und vo verschidene Liischtene sälber uusggwèhlti Lüüt uf di neutral Liischte überträge.
Bim Fuëssball isch es weniger wichtig. Aber da isch es i de Schwiiz ja einewäg eso, das zwar ali immer vom Tschutte schnured und alles besser wüssed, aber a d Mätsch gönd s nöd. Drum isch d Fifa i de Schwiiz.
Herr Hans, mir bliibed wië immer draa und danked für das Gschprȫȫch..
