Punkt achti-null-null, ohni Zmorge
Ampule füle fürs Labor
Dänn wartet bang mit liise Sorge
En zimmli tuuche Senior

Di schöne Sache, wi me weiss
Im Läbe sind halt nöd so gsund
Nu Sport mit Chrampfe und mit Schweiss
Erhaltet fit, statt schlaff und rund

Chunnt jetz bigoscht ächt d Retourgutsche
Für all dië Ggnüss und d Läbesluscht?
Nei, Gott seï Dank, chasch höre rutsche
Unnötig isch zum Glück dè Fruscht

De Langziitzuckerwert: erfreulich
Harnsüüri: s droht kän Schuub vo Gicht
Choleschterinwert: zonegräulich
Zum Glück no emal ghalte: s Gwicht

Da muësch de Tokter dankbar priise
Wo sorgt und euses Wohl bewacht
Trotz Sünde mit Getränk und Schpiise
Eus immer iisatzfähig macht

Nur churz isch d Freud, en Blick uf d Uhr
Statt Mittagsschlaf, de Räntner rännt
Zur nächschte Service-Prozedur
En Bohr-Event bim Tokter-dent.

Aus der hochdeutschen Version von 2009 übertragen: 7.12.2012 Ae