Muesch us de Oschtschwiiz Richtig Weschde
Git’s der am Morge scho de Reschde
Z Ohringe isch scho zimmli Schluss
Vo daa bis Töss nu no Verdruss
Und zwüsched Effi und em Glatt
Herrscht amig einewäg es Patt
Jetz hoffsch du nur, dass s dänn im Gubrischt
Wenigschtens mal nöd gar so schtrub ischt.
Wird ächt de Heiwäg besser sii?
Mer schtelled rasch de Radio ii
Dië Mäldige vo Dee-Err-Ess
Sind immer guët für gäg de Schtress:
«Ruum Züri, Fahrtrichtig Sanggale
Schtau wäge Ladig abegfale»
Vo Seebach aa muësch nüüt me wele
Bis nach em Chrüüz vo Brüttisele
Und vo de Maggi-Brugg bis Töss
Da trummled alli ganz nervös
Am Schtüürradchranz; di jetzig Show
Heisst drum scho wieder «Stop an go».
Wäg dere Gwalts-Mobilität
Wo eim vil Ziit iischpare tät
Säit mer em Handy «Mobilfon»
Es praktischs Ding mit Klingelton
S isch s Wichtigscht im ’ne Auto hüt
Für, dass mer chann ganz ohni Gschtrütt
Uusrichte, s werdi schpaat, de Frau:
«Ich schtahn im Winterthurer-Schtau.»
Illustration Roland Bärtsch, Egg b. ZH
