Wiisheite vom Schtammtisch
Xavi:
S git eim scho efang z dänke, wi überall z Mitteleuropa d Parteïe vo de Rächtspopulischte zuëleged. Sind dänn überall d Lüüt eso unzfride? Z Dütschland isch d AFD gliich schtarch wi d Union; z Öschtriich dië Schparglimänte, wo s bbruucht hät, zum en Kanzler vo ganz rächts verhindere; z Frankriich dië vile Le-Pen-Aahänger; z Italië de Erfolg vo de Frau Meloni; z Holland em Geert Wilders siini Freïheitsparteï.
Mugi:
Jä und dänn bi eus? Bi eus isch ja d SVP au mit Abschtand di schtärchscht Wählerparteï. D Angscht vor de Iiwanderig isch halt grösser als dië vor em Klimawandel.
Harri:
Da wǖǖr i jetz aber scho no chli en Underschiid mache! Bi eus schtimmed doch uf em Land bi de Wahle vil mit de SVP, will scho de Vater und de Grossvater i dere Partei oder i de daazmalige BGB gsii isch. Jede Puur und jede Chliigwerbler i de Dörfer hät doch nüüt anders kännt. I de Innerschwyz händ di katholische Puure bim Nameswächsel vo de CVP ddänkt, bim ene Wächsel zu de SVP bliibed mer under eus. S isch halt immer no e chli d Parteï vo de Bio-Schwiizer und drumm e Mehrheit. Und d Gaschtarbeiter sind i dene Chreis immer gschätzt gsii. Me hät s immer dringend bbruucht für dië Arbete, wo de Schwiizer z dräckig sind.
Xavi:
Potz woll! En zümftige Vortrag! Aber da häsch wahrschiindli rächt. Di weniger sympathisch Siite vo de Parteï nimmt me ja vor allem vo de Vorschtandsmitglieder i de Bundesparteï wahr. Und im Fernseh gseht ma halt nu Lüüt us de eidgenössische Rȫȫt, wo ihri Manuskript vom Sekretariat vorläsed. Und wo ebe z oberscht uf de Wahllischte gschtande sind. Aber di vile SVP-Gmeindspresidänte und Gmeindrȫȫt kännt me hingäge ja als ganz Normali.
Mugi:
Ja, und wänn s d Wahllischte amig müend uussortiëre, wüsed s mit FDP, SP oder Grüene nüüt aazfange, will s säged, miir sind ja kä Bänkler und kä Fabrikarbeiter und sicher e kä Demonschtrante mit Alleschläber.
Harri:
Dänn sind bi eus di Wählerschtärchschte halt scho wieder emal öppis Bsunders. Und us andere Gründ e Rächtsparteï, als di enttüüschte Oschttüütsche oder Heiweh-Habsburger. D Parteïschpitze repräsentiërt d Schwiiz ja uusgezeichnet: En Vizepresidänt und Zürcher Nationalrat redt Baselbiëtertüütsch, e Vizepresidäntin und Bündner Nationalrȫȫti wohnt z Meile und redt Züritüütsch und de Fraktionspresidänt und Zuger Nationalrat tönt eidüütig nach Schwarzbuëbeland. De Presidänt vom Iibrig isch aber unverwächselbar es unverbruuchts Original vo deet hine. Und immerhin isch glaub no niëmer vo dene mit ere Bluët-und-Bode-Friiheitstriichler-Bluuse uufträte.
Röösli, no dreï Schtange!
